ਨਵਾਂਸ਼ਹਿਰ 29 ਜਨਵਰੀ (ਹਰਿੰਦਰ ਸਿੰਘ)ਦੋਆਬਾ ਸੇਵਾ ਸਮਿਤੀ ਅਤੇ ਨੇਤਰ ਦਾਨ ਸੋਸਾਇਟੀ, ਨਵਾਂਸ਼ਹਿਰ ਦੇ ਜਨਰਲ ਸਕੱਤਰ ਰਤਨ ਕੁਮਾਰ ਜੈਨ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਗਣਤੰਤਰ ਦਿਵਸ ‘ਤੇ ਵੱਖ-ਵੱਖ ਖੇਤਰਾਂ ਵਿੱਚ ਮਿਸਾਲੀ ਭੂਮਿਕਾ ਨਿਭਾਉਣ ਵਾਲੇ ਵਿਅਕਤੀਆਂ ਨੂੰ ਸਨਮਾਨਿਤ ਕੀਤਾ ਜਾਂਦਾ ਹੈ। ਇਸ ਸਾਲ ਜ਼ਿਲ੍ਹੇ ਵਿੱਚ ਮੌਤ ਤੋਂ ਬਾਅਦ ਆਪਣੇ ਸਰੀਰ ਅਤੇ ਨੇਤਰਦਾਨ ਕਰਨ ਵਾਲੇ ਪਰਿਵਾਰਾਂ ਨੂੰ ਵੀ ਸਨਮਾਨਿਤ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਤਹਿਸੀਲ ਬੰਗਾ ਦੇ ਪਿੰਡ ਲੜੋਆ ਦੇ ਦਾਨੀ ਵਿਦਿਆ ਦੇ ਪੁੱਤਰ ਪੁਰਸ਼ੋਤਮ ਰਾਮ, ਬੰਗਾ ਦੇ ਨੇਤਰ ਦਾਨੀ ਰਮੇਸ਼ ਜੈਨ ਦੇ ਪੁੱਤਰ ਗੌਤਮ ਜੈਨ, ਨਵਾਂਸ਼ਹਿਰ ਦੇ ਵਾਸੀ ਸੰਤੋਸ਼ ਜੈਨ ਦੇ ਪੁੱਤਰ ਦਰਪਨ ਜੈਨ ਅਤੇ ਸੰਜੀਵ ਜੈਨ ਅਤੇ ਪਿੰਡ ਲੰਗੜੋਆ ਦੇ ਨੇਤਰ ਦਾਨੀ ਜੀਤ ਸਿੰਘ ਦੇ ਪੁੱਤਰ ਯਸ਼ਪਾਲ ਸਿੰਘ ਨੂੰ ਗਣਤੰਤਰ ਦਿਵਸ ਜ਼ਿਲ੍ਹਾ ਪੱਧਰੀ ਪ੍ਰੋਗਰਾਮ ਵਿੱਚ ਮੁੱਖ ਮਹਿਮਾਨ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਨੇ ਸਨਮਾਨਿਤ ਕੀਤਾ। ਨੇਤਰਦਾਨ ਸੋਸਾਇਟੀ ਦੇ ਪ੍ਰਧਾਨ ਡਾ. ਜੇ.ਡੀ. ਵਰਮਾ ਅਤੇ ਰਤਨ ਕੁਮਾਰ ਜੈਨ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਅਜਿਹੀ ਮਾਨਤਾ ਇਸ ਸੇਵਾ ਲਈ ਲੋਕਾਂ ਦਾ ਉਤਸ਼ਾਹ ਵਧਾਏਗੀ ਅਤੇ ਮੁਹਿੰਮ ਨੂੰ ਹੋਰ ਮਜ਼ਬੂਤ ਕਰੇਗੀ।
